ဂျပန်တွေက ဘာ့ကြောင့် တရုတ်ထက်ပိုပြီး နိုဘယ်ဆု ရကြတာလဲ

အောက်တိုဘာ ၁၀၊ ၂၀၁၆
M-Media

၂၀၁၆ ခုနှစ်အတွက် ဆေးဘက်ဆိုင်ရာ နိုဘယ်ဆု ရသည့် ဂျပန်ဇီဝဗေဒပညာရှင် ယိုရှီနိုရီ အိုဆူမီ

– တရုတ်နဲ့ ဂျပန်နိုင်ငံတို့ဟာ အစေးမကပ်တဲ့ တိုင်းပြည်နှစ်ခုဆိုတာ လူတိုင်းသိကြပါတယ်။ ဒါပေမယ့် အခုအချိန်မှာတော့ တရုတ်ပြည်သူတွေက ဘာ့ကြောင့် ဂျပန်နိုင်ငံဟာ တရုတ်ထက်ပိုပြီး နိုဘယ်ဆုတွေ ရရှိကြလဲဆိုတာကို လေ့လာ သုံးသပ်နေကြပြီ ဖြစ်ပါတယ်။

၂၀၁၆ ခုနှစ်အတွက် ဆေးဘက်ဆိုင်ရာ နိုဘယ်ဆုကို ဂျပန်ဇီဝဗေဒပညာရှင် ယိုရှီနိုရီ အိုဆူမီက ရရှိခဲ့ပြီး၊ ဒီနယ်ပယ်မှာပဲ ၂၀၁၅ ခုနှစ်က တရုတ်ဆေးဝါးဆိုင်ရာ ပညာရှင် တူ ယူယူက နိုဘယ်ဆု ရခဲ့ဖူးပါတယ်။ ဒါပေမယ့် ၁၉၄၉ ခုနှစ်နောက်ပိုင်း ဂျပန်နိုင်ငံက ရရှိခဲ့တဲ့ နိုဘယ်ဆု အရေအတွက်ဟာ ၂၅ ခုအထိ ရှိနေပြီး တရုတ်ကတော့ ဒီကာလအတွင်းမှာ ၃ ခုသာ ရရှိထားပါတယ်။

ဒါတောင် ၂၀၁၀ ခုနှစ်က တရုတ်တက်ကြွလှုပ်ရှားသူ လီရှောင်ဘိုကို ပေးအပ်တဲ့ နိုဘယ်ငြိမ်းချမ်းရေးဆုကိုပါ ထည့်တွက်မှ ၃ ဆု ဖြစ်ပြီး လီရှောင်ဘိုကို ဒီလို ဆုပေးမှုကို တရုတ်အစိုးရက လက်မခံတာကြောင့် နော်ဝေ-တရုတ် သံအဆက်အသွယ်တောင် ပြတ်တောက်သွားခဲ့ပါတယ်။ ဂျပန်ကတော့ အမေရိကန်ပြီးရင် ကမ္ဘာပေါ်မှာ နိုဘယ်ဆု အများဆုံးရရှိထားတဲ့နိုင်ငံ ဖြစ်ပါတယ်။

၁၉၄၉ ခုနှစ် တရုတ်ကွန်မြူနစ်ပါတီ အာဏာရပြီးတဲ့နောက်ပိုင်းမှာ တရုတ်ရူပဗေဒ ပညာရှင်တွေဖြစ်တဲ့ လီကျန်ဒေါင်နဲ့ ယန်ဂျန်နင်းတို့ဟာ တိုင်းပြည်က ထွက်ခွာသွားခဲ့ပြီး အမေရိကန်မှာ အလုပ်လုပ်နေတဲ့အချိန် ၁၉၅၇ ခုနှစ်မှာ ရူပဗေဒနယ်ပယ်အတွက် နိုဘယ်ဆုကို အတူ ရရှိခဲ့ပါတယ်။ နောက်ပိုင်းမှာတော့ သူတို့ ၂ ယောက်စလုံးဟာ အမေရိကန်နိုင်ငံသားတွေ ဖြစ်လာခဲ့ကြပါတယ်။

တရုတ်အစိုးရ ကျောထောက်နောက်ခံပြု Global Times စာစောင်ကတော့ ဂျပန်ရဲ့ ဒီလိုအောင်မြင်မှုနဲ့ပတ်သက်ပြီး သုံးသပ်တဲ့ ဆောင်းပါးတစ်ပုဒ်ကို ပြီးခဲ့တဲ့ ရက်ပိုင်းအတွင်းမှာ ရေးသားခဲ့ပါတယ်။ How can Japan win so many Nobel Prizes? (ဂျပန်တွေ ဘယ်လိုလုပ် နိုဘယ်ဆုအများကြီး ရကြတာလဲ) ဆိုတဲ့ခေါင်းစဉ်နဲ့ ရေးသားထားတဲ့ အဲဒီဆောင်းပါးဟာ တရုတ်နိုင်ငံရဲ့ ဆိုရှယ်မီဒီယာမှာ အလျင်မြန် ပြန့်နှံ့သွားခဲ့ပါတယ်။

ဒီဆောင်းပါမှာ ဂျပန်တွေရဲ့ သားသမီးတွေကို ပြုစုပျိုးထောင်မှုကို အောက်ပါအတိုင်း ထောက်ပြခဲ့ပါတယ်။

– ဂျပန်တွေဟာ ကလေးတွေကို သဘာဝတရားနဲ့ သိပ္ပံပညာရပ်အပေါ်မှာ စူးစမ်းလေ့လာတတ်အောင် ငယ်ငယ်ကတည်းက သင်ပေးကြပါတယ်။ (ယခုနှစ်နိုဘယ်ဆုရသွားတဲ့) အိုဆူမီကိုယ်တိုင် ငယ်ငယ်တုန်းက သူဟာ ကြမ်းပိုးလေးတွေကိုကြည့်ပြီး အံ့သြခဲ့ရတယ်လို့ ပြောခဲ့ပါတယ်။ ဂျပန်ပြည်တွေဟာ ဂုဏ်သိက္ခာရဲ့ အရသာကို မြည်းစမ်းချင်စိတ်၊ သဘာဝပတ်ဝန်းကျင်နဲ့ နီးနီးကပ်ကပ်ရှိတဲ့ အခြေအနေမျိုး စတာတွေနဲ့ ကြီးပြင်းလာခဲ့တာပါ။

– တရုတ်နိုင်ငံက မိဘတွေကတော့ ကလေးတွေရဲ့ ရုပ်ပိုင်းဆိုင်ရာ ကျေနပ်ပျော်ရွှင်မှုကိုပဲ ပိုပြီး အဓိကထားတယ်။ ဂျပန်တွေက ကလးတွေကို မှီခိုမှုကင်းဖို့ အားပေးကြတယ်။ ဥပမာအားဖြင့် ဂျပန်မိဘတွေဟာ သူတို့ရဲ့ ကလေးတွေအတွက် ကောလိပ် ကျူရှင်လခကို ပုံမှန် ပေးလေ့ရှိပေမယ့် ဂျပန်ကျောင်းသားတွေက သူတို့နေထိုင်ဖို့ သုံးစွဲဖို့အတွက် အလုပ်လုပ်ဖို့ ဆန္ဒရှိကြတယ်။

– ဂျပန်နိုင်ငံက သိပ္ပံသုတေသတွေဟာ ပိုလွတ်လပ်ပြီး၊ အစိုးရရဲ့ ၀င်ရောက်စွက်ဖက်မှုကနေ သိသိသာသာကင်းလွတ်တယ်။ ဂျပန်ပညာရှင်တွေဟာ သုတေသနမှာ မအောင်မြင်ရင် အလုပ်ပြုတ်သွားမယ်ဆိုတဲ့ ဖိအားမျိုးမရှိဘူး။ အဲဒီလို ဖိအားမရှိခြင်းကပဲ သူတို့ရဲ့ အလုပ်မှာ အချိန်တော်တော်ကြ နှစ်မြုပ်လုပ်ဆောင်မှုကို ဖြစ်စေပါတယ်။

– ဂျပန်သိပ္ပံပညာရှင်တွေဟာ တရုတ်သိပ္ပံပညာရှင်တွေထက် ကမ္ဘာ့အမြင်ပိုကျယ်ပြီး ဒါဟာ အခြားတိုင်းပြည်တွေက ပညာရှင်တွေနဲ့ မကြာခဏ ပညာဖလှယ်မှုတွေ ပြုလုပ်ကြလို့ ဖြစ်ပါတယ်။ ဂျပန်နိုင်ငံမှာ သိပ္ပံဆိုင်ရာ သုတေသနအတွက် ကမ္ဘာ့အဆင့် အဆောက်အဦးတွေ၊ အသုံးအဆောင်တွေရှိနေပြီး အဲဒီအတွက် အစိုးရက သိသိသာသာ ထောက်ပံ့ပေးပါတယ်။

အဲဒီထောက်ပြချက်တွေကို တရုတ်ပြည်သူတော်တော်များများကလည်း လက်ခံခဲ့ကြပါတယ်။

တရုတ်နိုင်ငံရဲ့ Twitter လို့သိကြတဲ့ Weibo မှာ အသုံးပြုသူတစ်ယောက်က သိပ္ပံနယ်ပယ်မှာ အောင်မြင်နဲ့ပတ်သက်ပြီး ဂျပန်နဲ့ တရုတ်တို့ရဲ့ ခြားနားချက်ကို အခုလို ထောက်ပြခဲ့ပါတယ်။

“ဂျပန်က နိုဘယ်ဆုတွေအများကြီးရတာဟာ သိပ်မဆန်းပါဘူး။ ဘာ့ကြောင့်လည်းဆိုတော့ ဒီနေ့ ဂျပန်ရဲ့ သိပ္ပံဆိုင်ရာ အောင်မြင်မှု အများစုဟာ ဂျပန်က ချမ်းသာကြွယ်ဝပြီး သိပ္ပံသုတေသနမှာ ငွေကြေးကို လိုလိုချင်ချင် အသုံးပြုခဲ့တဲ့ လွန်ခဲ့တဲ့ နှစ်ပေါင်း ၂၀၊ ၃၀ လောက်က အခြေတည်ခဲ့တာဖြစ်ပါတယ်။ ဒါပေမယ့် တရုတ်နိုင်ငံကတော့ ၁၉၇၈ ခုနှစ်ကမှ ပြုပြင်ပြောင်းလဲမှု၊ ပေါ်လစီဖြေလျှော့မှုတွေလုပ်ခဲ့တာဖြစ်ပြီး ဒါတောင် လူတော် တော်တော်များများ ဖိနှိပ်ခံခဲ့ရတဲ့ ၁၀ နှစ်ကြာ ယဉ်ကျေးမှု တော်လှန်ရေးကို ထည့်မတွက်ထားပါဘူး”

ဝေဖန်သူ နောက်တစ်ဦးကလည်း တရုတ်နိုင်ငံရဲ့ ပညာရေးစနစ်ကို ဝေဖန်ခဲ့ပြီး ကျောင်းသားရဲ့ လွတ်လပ်စွာ တွေးခေါ်နိုင်စွမ်းကို သတ်ပစ်နေတဲ့နေရာလို့ ကင်ပွန်းတပ်ခဲ့ပါတယ်။

“နေ့တိုင်း သူတို့တွေ ကျောင်းသွားတယ်၊ ကျောင်းက ပြန်လာတယ်။ အိမ်စာတွေ တစ်ပုံတစ်ပင်ကို လုပ်ရတယ်။ ဒါက သူတို့ရဲ့ စဉ်းစားတွေးခေါ်မှုကို သင်းသတ်သလို ဖြစ်စေပါတယ်”

Global Times ကို ဖတ်ရှုတ်တဲ့သူ တစ်ယောက်ကတော့ နိုဘယ်ဆု ချီးမြှင့်မှုကို မေးခွန်းထုတ်ခဲ့ပါတယ်။

“ပွင့်ပွင့်လင်းလင်းပြောရရင် တစ်ချို့နိုဘယ်ဆုပေးမှုတွေက မေးခွန်းထုတ်စရာကောင်းနေတယ်။ တရုတ်နိုင်ငံက ဆောင်ရွက်ရမှာက တရုတ်ပြည်သူတွေရဲ့ ဘ၀တွေနဲ့ အသက်မွေးမှုတွေ တိုးတက်စေမယ့် နည်းလမ်းတွေ၊ လမ်းကြောင်းတွေ ရှာဖွေရမှာပါ။ တရုတ်နိုင်ငံက နိုဘယ်ဆုတွေ ရလား၊ မရဘူးလားဆိုတာက အဓိကမကျပါဘူး”

Ref: qz.com

Related Posts

• ကာဘွန်လျှော့ချရေး သဘောတူညီချက်တွင် ကန်နှင့် တရုတ်တို့ လက်မှတ်ထိုးမည် (Sep 3, 2016)
• အာဖရိကတွင် ဂျပန်က ကန်ဒေါ်လာ ဘီလီယံ ၃၀ ရင်းနှီးမြှုပ်နှံမည် (Aug 28, 2016)
• Pokemon Go ကြောင့် ဂျပန်တွင် ပထမဆုံး လူသေဆုံးမှုဖြစ် (Aug 25, 2016)
• တောင်တရုတ်ပင်လယ်တွင် ကန်နှင့်ပူးပေါင်းနိုင်ခြေအတွက် ဂျပန်ကို တရုတ်က ပြင်းထန်စွာ သတိပေး (Aug 23, 2016)
• ဂျပန်တိုင်ဖုန်း လူ ၁ ဦးသေ၊ ဒါဇင်နှင့်ချီ ဒဏ်ရာရ (Aug 23, 2016)
• ဂျပန်ပင်လယ်ပြင်တွင် တရုတ်ရေတပ် စစ်ရေးလေ့ကျင့် (Aug 20, 2016)
• ဆီးရီးယားအစိုးရနှင့် စစ်ဖက်ဆက်ဆံရေး တရုတ်တိုးမြှင့်မည် (Aug 18, 2016)
• ကွမ်တန်ဂြိုဟ်တုလွှတ်တင်ကာ အာကာသ သမိုင်းတွင် တရုတ်က မှတ်တိုင်သစ် စိုက်ထူ (Aug 16, 2016)
• ဂျပန်ရှိ ခရီးသွားလုပ်ငန်းများ မွတ်စလင်များအတွက် အထူးဝန်ဆောင်မှုများ တိုးမြှင့်လုပ်ဆောင်လာ (Aug 14, 2016)
• တရုတ်မှာ မိမိတို့ပိုင်နက်ကို ကျူးကျော်သည်ဟု ဂျပန်ပြော (Aug 9, 2016)