“တက္ကသိုလ်ဝင်တန်း စာမေးပွဲဖြေဆိုခွင့် ဖောင်အပယ် မခံရလေအောင်”

တက္ကသိုလ်ဝင်တန်းစာမေးပွဲကြီးသည် မြန်မာနိုင်ငံတွင် ကျောင်းသား၊ကျောင်းသူ၊မိဘများ၊ ညီအစ်ကို၊ မောင်နှမများ၊ ဆွေမျိုးသားချင်းများ စိတ်ဝင်စားရဆုံး စိတ်လှုပ်ရှားရဆုံးသော စာမေးပွဲ တစ်ခုဖြစ်နေပါသည်။ ၂၀၁၇ခုနှစ် မတ်လ ၈ရက်မှ ၁၇ ရက်ထိကျင်းပခဲ့သော တက္ကသိုလ်ဝင်တန်း သိပ္ပံတွဲ၊ဝိပ္ပံတွဲ၊ဝိဇ္ဖာတွဲများ ဖြေဆိုရန် တစ်နိုင်ငံလုံးအတိုင်းအတာဖြင့် ဝင်ခွင့်လျှောက်တင်သွင်း ပေါင်းမှာ ၇၆၇၄၂၂ ဦးရှိခဲ့သော်လည်း အမှန်တကယ်ဖြေဆိုခဲ့သူပေါင်းမှာ ၇၁၆၁၈၈ ဦးသာ ရှိခဲ့ပါသည်။

“၂၀၁၈ ခုနှစ် မတ်လအတွင်း ဖြေဆိုမည့် တက္ကသိုလ်ဝင်တန်း စာမေးပွဲဖြေဆိုခွင့် လျှောက် လွှာများကို ကျောင်းဖြေရော၊ အပြင်ဖြေရော စက်တင်ဘာလ ၁ရက်မှ ၂၉ ရက်အတွင်း မြန်မာနိုင်ငံ စာစစ်ဦးစီးဋ္ဌာနသို့ အပြီး တင်သွင်းရမည်ဟု” မြန်မာနိုင်ငံစာစစ်ဦးစီးဋ္ဌာန ညွှန်ကြားရေးမှူးချုပ် ဦးမျိုးညွှန့်က ပြောကြားခဲ့ပေသည်။

မြန်မာနိုင်ငံတွင် အခြေခံပညာ အထက်တန်းကျောင်းများ၊ကျောင်းခွဲများ၊တွဲဖက် အထက ကျောင်းများနှင့် (ပုဂ္ဂလိက) ကိုယ်ပိုင်အထက်တန်းကျောင်းများ တက်ရောက်နေသူများကို “ကျောင်းဖြေ”ဟု သိထားကြပါသည်။ တက္ကသိုလ်ဝင်တန်းစာမေးပွဲမှာ တစ်နှစ်ကျရှုံးပြီး အဆိုပါ ကျောင်းများ မတက်ဘဲ စာဖြေသူများကို “အပြင်ဖြေ”ဟု နားလည်ထားကြပါသည်။

ကျောင်းဖြေသူများသည် မိမိတို့ အတန်းပိုင်ဆရာ၊ ဆရာမများမှ တဆင့် သက်ဆိုင်ရာ ကျောင်းအုပ်ကြီးများထံသို့လည်းကောင်း၊ အပြင်ဖြေသူများသည် မိမိတို့၏သက်ဆိုင်ရာ မြို့နယ် ပညာရေးမှူးရုံးများတွင်လည်းကောင်း စာမေးပွဲဖြေဆိုခွင့်ဖောင်နှင့် ကတ်ပြားများကို သတ်မှတ် ထားသော ရက်အတွင်း အချိန်မီတင်ရမည်ဖြစ်သည်။

စာမေးပွဲဖြေဆိုမည့် လျှောက်လွှာရှင်များသည် မိမိတို့ဖြေဆိုကြမည့် ဘာသာတွဲများ ၁၊၅၊၆၊ ၇၊၈ ဖြစ်ပါက အစိမ်းရောင်ဝင်ခွင့်လျှောက်လွှာနှင့် ကတ်ပြားအစိမ်းကိုလည်းကောင်း၊ဘာသာတွဲ ၂၊ ၃၊၄ဖြင့် ဖြေဆိုမည့်သူများသည် ပန်းရောင်ဝင်ခွင့်လျှောက်လွှာနှင့် ပန်းရောင်ကတ်ပြားများဖြင့် တက္ကသိုလ်ဝင်တန်းစာမေးပွဲဖြေဆိုခွင့်ကို ဖြည့်စွက် တင်ထားရမည်ဖြစ်ပါသည်။

ပြည်နယ်နှင့်တိုင်းဒေသ အသီးသီးရှိ အခြေခံပညာဦးစီးဋ္ဌာန လက်အောက်ရှိ မြို့နယ် ပညာရေးမှူးနှင့် ကျောင်းအုပ်ကြီးများအား မြန်မာနိုင်ငံစာစစ်ဦးစီးဋ္ဌာန အနေဖြင့် စာမေးပွဲဖြေဆိုခွင့် လျှောက်လွှာတစ်စုံလျှင် ၂၀၀ကျပ် ငွေသွင်းတံဆိပ်ခေါင်းခ ၇၀၀ကျပ်တို့ဖြင့်ရောင်းချရန် ညွှန်ကြား ထားခဲ့သော်လည်း လက်တွေ့တွင် စာရေးသူအနေဖြင့် လေ့လာကြည့်ရာ ရန်ကုန်တိုင်းဒေသကြီးရှိ မြို့နယ်ပညာရေးမှူးရုံးများနှင့် အခြေခံပညာ အထက်တန်းကျောင်းများတွင်ပင် စာမေးပွဲဖြေဆိုခွင့် လျှောက်လွှာရောင်းချသည့် နှုန်းထားများ မတူညီကြောင်း သိရှိရပေသည်။ ဥပမာပြရလျှင် ရန်ကုန် တိုင်းဒေသကြီးရှိ သင်္ကန်းကျွန်းမြို့နယ်တွင် လျှောက်လွှာ တစ်စုံလျှင် ၃၀၀ ကျပ် (တံဆိပ်ခေါင်းခမ ပါ) ဒေါပုံမြို့နယ်တွင် ၅၀၀ကျပ် (တံဆိပ်ခေါင်းခ မပါသေး) ဖြင့် စာရေးသူကိုယ်တိုင်ဝယ်ယူခဲ့ပါ သည်။ အခြေခံပညာကျောင်း၊ အထက်တန်းကျောင်း အတော်များများတွင် စာမေးပွဲဖြေဆိုခွင့် ဖောင် နှင့် တံဆိပ်ခေါင်းခများအတွက် ကျောင်းသား၊ ကျောင်းသူတစ်ဦးလျှင် ၁၅၀၀ကျပ် ကောက်ခံနေသော ကျောင်းများရှိသလို ၁၇၀၀ကျပ် ကောက်ခံနေသော ကျောင်းများလည်း ရှိနေပါ သည်။

တက္ကသိုလ်ဝင်တန်း စာမေးပွဲကြီးဖြေဆိုခွင့် ကတ်ပြားများကို စာမေးပွဲကြီးမတိုင်မီ ၁၀ ရက် အလိုတွင် ကျောင်းဖြေဆိုသူများအတွက် မိမိတို့ တက်နေသည့် အခြေခံပညာအထက်တန်း ကျောင်းများ၊ (အထက)တွဲဖက်ကျောင်းခွဲများ၊ (ပုဂ္ဂလိက) ကိုယ်ပိုင်အထက်တန်းကျောင်းများတွင် ထုတ်ယူနိုင်ပြီး အပြင်ဖြေများသည် မိမိတို့ စာမေးပွဲဖြေဆိုခွင့်တင်ထားခဲ့သည့် မြို့နယ် ပညာရေးမှူး ရုံးများတွင် ထုတ်ပေးနေသည်မှာ ဆယ်စုနှစ်ပေါင်းများစွာရှိခဲ့ပေသည်။ ထိုစာမေးပွဲဖြေဆိုခွင့်ကတ် ပြားများကို ထုတ်ယူပြီးတိုင်း မိတ္ထူ တစ်စုံလောက် အနည်းဆုံးကူးယူထားကြပါရန် စာရေးသူ အနေဖြင့် အကြံပြုတိုက်တွန်းလိုပါသည်။

ထိုစာမေးပွဲဖြေဆိုခွင့် အစိမ်းရောင်ကတ်ပြား (သို့မဟုတ်) ပန်းရောင်ကတ်ပြားကို တက္ကသိုလ်ဝင်တန်းစာမေးပွဲကြီး ဖြေဆိုသည့်နေ့တွင် သက်ဆိုင်ရာ စာစစ်ဋ္ဌာနရှိ တာဝန်ခံက သိမ်း ဆည်းလေ့ရှိသည်။ အချို့စာစစ်ဋ္ဌာနများတွင်မူ စာမေးပွဲကြီး ဖြေဆိုပြီးစီးသည်မှ သိမ်းဆည်းလေ့ရှိပါသည်။

စာရေးသူအနေဖြင့် ပညာရေးလောကကို နှစ်၃၀လောက် ဖြတ်သန်းခဲ့သဖြင့် ကျောင်းသား၊ ကျောင်းသူများ၏ ဘဝကို ပုံဖော်ရာတွင် အရေးအကြီးဆုံးဖြစ်နေသည့် တက္ကသိုလ်ဝင်တန်းစာမေးပွဲ ကြီး စာမေးပွဲဖြေဆိုခွင့် ဖောင်များတင်ကြရာတွင် သတိပြုစရာ ဆောင်ရန်၊ ရှောင်ရန် တို့ကို တင်ပြလိုပါသည်။

၁။ စာဖြေမည့်သူတိုင်းသည် မိမိတို့၏ဖခင်နှင့် မိခင်တို့၏အမည်များကို အင်္ဂလိပ်လိုရေးသားရာတွင် စကားလုံးတိုင်းကို စာလုံးကြီး capital letter ရေးသားရပါမည်။ ဥပမာ U MAUNG TUN , DAW HTAY HTAY WIN
၂။ဓာတ်ပုံကို ကာလာအရောင် သို့မဟုတ် အဖြူ၊အမဲတစ်လက်မ (သို့မဟုတ်) တစ်လက်မခွဲ ပတ်လည်အရွယ်အစားကို ဖောင်ရဲ့ သတ်မှတ်ထားသော နေရာ ၂ ခုတွင် ကပ်ပေးရပါမည်
၃။ ဖြေဆိုမည့်သူသည်နှစ်တက် (Fresher) ဖြစ်လျှင် ၊ နဝမတန်း ခုံအမှတ်နှင့် ဖြေဆိုအောင်မြင်ခဲ့ သည့် ကျောင်းအမည်နှင့်မြို့နယ်တို့ကို တိတိကျကျဖော်ပြရပါမည်။ ဖြေဆိုသည် နှစ်ကျ (Repeater) ဖြစ်လျှင် နဝမတန်းခုံအမှတ်အပြင် မနှစ်ကဖြေဆိုခဲ့သည့် တက္ကသိုလ်ဝင်တန်းခုံအမှတ် စာစစ်ဋ္ဌာန မြို့နယ်တို့ကို ဖြည့်စွက်ရပါမည်။ အကြောင်းအမျိုးမျိုးကြောင့် ခုံအမှတ်တို့ကို မေ့လျော့ နေပါက မိမိဖြေဆိုခဲ့သည့် မြို့နယ်ပညာရေးမှူးရုံးတွင် စုံစမ်းနိုင်ပါသည်။
၎။ဖြည့်စွက်ချက်၊ အမှားအယွင်းရှိပါက တာဝန်ရှိသူမှ လိုအပ်ချက်များကို တောင်းခံနိုင်ရန် ဖောင်၏ ဖုန်းနံပါတ် ဖြည့်သည့်နေရာတွင် မိမိအားအချိန်မရွေး ဆက်သွယ်နိုင်သည့် ဖုန်းနံပါတ်ကိုသာ ဖြည့်စွက်ပေးစေချင်ပါသည်။
၅။ဖြေဆိုခွင့်ကတ်ပြားအစိမ်း (သို့မဟုတ်) ပန်းရောင်ပေါ်တွင် မည်သည့် အမှားကိုမျှ မပြုလုပ်ရပါ။ မှားခဲ့သော အမှားနေရာကို correction pen ဖြင့်လုံးဝ မပြင်ရပါ။ အရမ်းအရေးကြီးပါသည်။
၆။ ထို့ကြောင့် မူရင်းဖောင်ကို မဖြည့်မီ အရင်ဦးဆုံး ဖောင်စာရွက်နှင့်ကတ်ပြားတို့ကို မိတ္ထူကူးထား သင့်ပါသည်။ ပြီးမှ ထိုမိတ္ထူစာရွက်ပေါ်တွင် တိတိကျကျ ဖြည့်စွက်ပြီး နားလည်တတ်ကျွမ်းသူတစ်ဦး ဦး ဆရာ၊ဆရာမ၊ကျောင်းစာရေး မြို့နယ်ပညာရေးမှူးမှအတွေ့အကြုံရှိသူ တစ်ဦးဦးအား ပြသပြီးမှ မူရင်းဖောင်နှင့်ဖြေဆိုခွင့်ကတ်ပြားပေါ်တွင် ဖြည့်စွက်သင့်ပါသည်။
၇။မိမိဖြေဆိုမည့် ဘာသာတွဲကို ဖြည့်စွက်ရာတွင် ဇီဝဗေဒဘာသာတွဲ၊ ဘောဂဗေဒဘာသာတွဲ စသည်တို့ကို မှားယွင်းစွာမဖြည့်မိဖို့ လုံးဝ၊လုံးဝ အရေးကြီးပါသည်။

“သတိမမူ၊ ဂူမမြင်”၊ သတိမူက၊ မြူမှုန်ကိုပင် မြင်နိုင်စွမ်းရှိသည်ကို အနာဂတ်လူငယ်ကျောင်းသားတိုင်း သတိချပ်သင့်လှပေသည်။ မိမိတို့ အနာဂတ်ရည်မှန်းချက်များ လှမ်းတက်ရာတွင် လှေကားထစ်သဖွယ်ဖြစ်သည့်၊ ပေါင်းကူးတံတားတစ်ခုဖြစ်သည့် တက္ကသိုလ်ဝင် တန်းစာမေးပွဲဖြေဆိုခွင့်ဖောင်နှင့်ကတ်ပြားကို ပြီးစလွယ် ပေါ့ပေါ့တန်တန် သဘောထားပြီး ဖြည့်စွက်ခဲ့ပါက နှောင်းနောင်တရမည့်သူမှာ မိမိသာဖြစ်ကြောင်း။ ထို့ကြောင့် အသိ၊သတိနှင့်ယှဉ် ကာ “ဆောင်ရန်၊ ရှောင်ရန်” တို့ကို အလေးထားဂရုပြုပြီး လုပ်ဆောင်သင့်ပါကြောင်း လေးလေးနက်နက် တိုက်တွန်းအပ်ပါသည်။

လေးစားလျက်
ဂျက်ဖရီတင်အုန်း (ရန်ကုန်စက်မှုတက္ကသိုလ်)

Related Posts

• 7 July ကျောင်းသားအရေးတော်ပုံကြီးကို ပြည်သူတွေ ယနေ့တိုင် မမေ့နိုင်ဖြစ်ရသည်မှာ (Jul 3, 2017)
• “အမှန်တရားဖော်ထုတ်သည့် နိုင်ငံသားများအား ခြိမ်းခြောက်နေသည့် ဥပဒေ ၆၆(ဃ)” (Jun 28, 2017)
• “ဘယ်လိုပဲဖြစ်စေ ငြင်းလို့မရတဲ့ ဂုဏ်ယူစရာပါ'” (Jun 23, 2017)
• “ယနေ့ကျောင်းသားလူငယ်များ အရေး ရတက်မအေးဖြစ်မိ” (Jun 19, 2017)
• “ မျှော်လင့်တိုင်းဖြစ်မလာသည့် တက္ကသိုလ်ဝင်တန်း စာမေးပွဲ အောင်စာရင်းများ” (Jun 12, 2017)
• ” ၂၀၁၇-၂၀၁၈ ခု ပညာသင်နှစ် တော်၊သင့်၊ညံ့ စုပေါင်းစနစ် ကို ကျောင်းသား မိဘတွေ သဘောမကျ” (Jun 2, 2017)
• “မြင်မြင်သမျှ ပါမောက္ခ၊ တွေ့သမျှလူ ပါရဂူ” (May 22, 2017)
• “ပြည်တွင်းငြိမ်းချမ်းရေးနှင့်ဒီမိုကရေစီ ဖက်ဒရယ်ခရီးကို လှမ်းလိုလျှင်” (May 16, 2017)
• “ယနေ့ခေတ် ပညာရေးကို စကားလုံးဝေါဟာရတွေနဲ့ ပဲ တန်ဆာဆင်ပြီး အချိန် မကုန်သင့်” (Apr 25, 2017)
• “မြန်မာ့ပညာရေး စနစ်ကို ဆင်ကန်းတောတိုး မြေစမ်းခရမ်းပျိုး ပုံစံမျိုး မဖြစ်စေချင်” (Mar 25, 2017)

The post “တက္ကသိုလ်ဝင်တန်း စာမေးပွဲဖြေဆိုခွင့် ဖောင်အပယ် မခံရလေအောင်” appeared first on News @ M-Media.