ခရစ္စမတ်မှာ လူနည်းစုခရစ်ယာန်များနှင့် တစ်သားတည်းရှိကြောင်း ပြသလိုက်တဲ့ အီရတ်မွတ်စလင်များ

ဒီဇင်ဘာ ၂၆၊ ၂၀၁၆
M-Media

ဘဂ္ဂဒတ်မြို့လယ်ကောင်မှ ခရစ္စမတ်သစ်ပင်တစ်ခု

– ဘဂ္ဂဒတ်မြို့ရှိ ရှော့ပင်းမောလ်တစ်ခုရှေ့တွင် စိုက်ထူထားကာ ကြီးမားပြီး လင်းလက်တောက်ပနေသည့် ခရစ္စမတ်သစ်ပင်မှာ မွတ်စလင်အများစုရှိရာ အီရတ်နိုင်ငံတွင် ခရစ္စမတ်ပွဲတော်ကို တစ်မူထူးခြားစေသည်။

မြို့၏ အရှေ့တောင်ပိုင်း Smaa Mall ရှိ ကြယ်များ၊ ခေါင်းလောင်းလေးများဖြင့် ဆင်ယင်ချယ်သထားပြီး ၇ မီတာမြင့်သည့် အဆိုပါ ခရစ္စမတ်သစ်ပင်က နိုင်ငံအတွင်းရှိ ခရစ်ယာန်လူနည်းစုများနှင့် တစ်သားတည်းရှိကြောင်း ပြသသည့်အနေဖြင့် နိုင်ငံတစ်ဝှမ်း စိုက်ထူထားသော ခရစ္စမတ်သစ်ပင်များစွာထဲမှ တစ်ခုဖြစ်လေသည်။

IS အကြမ်းဖက်သမားများအပေါ် စစ်ပွဲဆင်နွှဲရာတွင် ရင်ဆိုင်ခဲ့ရသည့် ဒုက္ခသုက္ခများကို အီရတ်ပြည်သူများ မေ့ပျောက်စေရန် ရည်ရွယ်သည့် အဆိုပါသစ်ပင်ကြီးကို မွတ်စလင်စီးပွားရေးသမား ယာစီရ် ဆအဒ်က စတာလင်ပေါင် ၁၉၀၀၀ ခန့် အကုန်အကျခံကာ ဖန်တီးခဲ့ခြင်းဖြစ်သည်။

“ဒီခရစ္စမတ်သစ်ပင်က ချင်ခြင်းမေတ္တာနဲ့ ငြိမ်းချမ်းမှုကို ဖော်ကြူးနေတာဗျ။ အီရတ်ခရစ်ယာန်တွေအနေနဲ့ သူတို့ရဲ့ ဇာတိမြေကိုပြန်လာပြီး ပုံမှန်အတိုင်း ငြိမ်းချမ်းစွာ နေထိုင်နိုင်ပါစေလို့ ကျွန်တော် ဆုမွန်ကောင်းတောင်းပါတယ်” ဟု ဘဂ္ဂဒတ်ရှိ အများပြည်သူ အပန်းဖြေပန်းခြံတွင် ထားရှိသည့် ၈၅ ပေမြင့်သော ခရစ္စမတ်သစ်ပင်နှင့်ပတ်သက်၍ လာရောက်လည်ပတ်သူ ဆာဘာ အစ္စမေးလ်က ပြောကြားခဲ့သည်။

အီရတ်နိုင်ငံရှိ ခရစ်ယာန်လူနည်ုးများမှာ ၂၀၀၃ ခုနှစ် အမေရိကန်ဦးဆောင်သည့် ကျူးကျော်စစ်နောက်ပိုင်း ညှင်းပမ်းနှိပ်စက်မှုများကို ကြုံတွေ့ခံစားခဲ့ရသည်။

အီရတ်နိုင်ငံ၏ ဒုတိယမြို့တော်ဖြစ်ပြီး ၂၀၁၄ ခုနှစ်ကတည်းက IS ၏ ခြေကုပ်စခန်းဖြစ်သော မူဆိုလ်းတွင် ခရစ်ယာန်များမှာ အစွန်းရောက်သမားများ၏ ပစ်မှတ်ထားမှုကို ခံခဲ့ရသည်။ နှိမ့်ချသည့် အသုံးအနှုန်းဖြင့် ခေါ်ဝေါ်ခံခဲ့ရသလို၊ မြို့မှထွက်သွားရန် သို့မဟုတ် အသေခံရန် သို့မဟုတ် အစ္စလာမ်ဘာသာကူးပြောင်းရန်
အကြမ်းဖက်သမားများ၏ အကြပ်ကိုင်ခြိမ်းခြောက်မှုကိုလည်း ခံခဲ့ရသည်။

ခရစ်ယာန်ဘာသာဝင်များရှိနေသည့် ဘဂ္ဂဒတ်၏ လူစည်းကားရာ ကာရာဒါရပ်ကွက်ရှိ Sama Mall ဈေးဝယ်စင်တာတွင် အလုပ်လုပ်နေသည့် အမ်မာရ် ဟူစိန်က အလွှာအသီးသီးမှ မွတ်စလင်များမှာ ခရစ္စမတ်သစ်ပင်များနှင့် ပွဲတော်ကာလ ထုတ်ကုန်များကို ၀ယ်ယူအားပေးနေကြသည်ဟု ပြောကြားခဲ့သည်။

“တစ်နိုင်ငံတည်းသားတွေနဲ့ ဒီအားလပ်ရက် အခါသမယမှာ ဆင်နွှဲရတာကို မွတ်စလင်တွေလည်း နှစ်သက်ပါတယ်” ဟု ဟူစိန်က ပြောကြားခဲ့ပြီး နိုင်ငံအတွင်းရှိ ခရစ်ယာန်လူနည်းစုများအပေါ် တရားမဲ့မှုများမှာ မွတ်စလင်များဘက်မှ လာခြင်းမဟုတ်ဘဲ အီရတ်နိုင်ငံကို မုန်းတီးသူ အမုန်းဝါဒီများထံမှ လာခြင်းဖြစ်သည်ဟုလည်း ထည့်သွင်းပြောဆိုခဲ့သည်။

မွတ်စလင်ဇနီးမောင်နှံစုံတွဲက မိမိတို့မှာ အစ္စလာမ့်အားလပ်ရက်များနည်းတူ ခရစ္စမတ်ပွဲတော်ကို ဆင်နွှဲရန်အတွက် ခရစ္စမတ်သစ်ပင်ငယ်လေးများ၊ လလ်ဆောင်များကို ၀ယ်ယူခဲ့သည်ဟု ဆိုသည်။

“ဒီအချိန်ဟာ တစ်နှစ်တာလုံးမှာ ပျော်စရာအကောင်းဆုံးအချိန်ပါ။ အတူယှဉ်တွဲနေထိုင်မှုအတွက် ကျွန်မတို့ ထွေထွေထူးထူး သက်သေပြစရာ မလိုပါဘူး။ ကျွန်မတို့ဟာ တစ်နိုင်ငံတည်းသားတွေပါ” ဟု ၎င်းတို့က ပြောကြားခဲ့သည်။

၂ နှစ်အတွင်း ပထမဆုံး ခရစ္စမတ်

IS လက်မှလွတ်မြောက်ပြီးနောက် ၂ နှစ်အတွင်း ပထမဆုံး ခရစ္စမတ်ပွဲတော်ကို ဆင်နွှဲရသည့် အက်ဆီရီယန်ခရစ်ယာန်များ ၀တ်ပြုဆုတောင်းနေစဉ်

မူဆိုးလ်မြို့အနီး IS အကြမ်းဖက်အဖွဲ့လက်အောက်မှ ယခုနှစ်တွင် လွတ်မြောက်လာခဲ့သည် မြို့များတွင်လည်း ခရစ်ယာန်များမှာ ၂၀၁၃ ခုနှစ်နောက်ပိုင်း ပထမဆုံး ခရစ္စမတ်ပွဲတော်ကို ဆင်နွှဲခဲ့ကြသည်။

မူဆိုးလ်မြို့အရှေ့ဘက် ၁၃ မိုင်အကွာရှိ အက်ဆီရီယန် မြို့ငယ်လေးမှ ထွက်ပြေးခဲ့ကြရသည့် ခရစ်ယာန်များမှာ ခရစ္စမတ်အကြိုညတွင် ၎င်းတို့ဒေသရှိ Bartella
ဘုရားကျောင်းသို့ ပြန်လည် လာရောက်စုရုံးခဲ့ကြသည်။

“ပျော်ရွှင်မှုတွေ၊ ၀မ်းနည်းမှုတွေ ရောထွေးနေပါတယ်။ ကျွန်တော်တို့ရဲ့ မြင့်မြတ်ရာနေရာတွေကို ကျွန်တော်တို့နိုင်ငံသားတွေက ဖျက်ဆီးထားတာတွေကို ကြည့်ရင်း ကျွန်တော်တို့ ၀မ်းနည်းကြေကွဲရပါတယ်။ ဒါပေမယ့် ၂ နှစ်ကျော်အတွင်းမှာ ပထမဆုံး ၀တ်ပြုဆုတောင်းခွင့်ရတဲ့အတွက်လည် ပျော်ရွှင်မိပါတယ်” ဟု ဘုန်းတော်ကြီး မူဆာ ရှီမာနီက ပြောကြားခဲ့သည်။

Bartell ဘုရားကျောင်းက စစ်ဆင်ရေးဇုန်အတွင်း ဆက်လက်ရှိနေသောကြောင့် အီရတ်စစ်တပ်က အနီးကပ် လုံခြုံရေး ယူပေးထားသည်။ ဘေးပတ်ဝန်းကျင်ရှိ နေအိမ်များကတော့ ဖျက်ဆီးခံခဲ့ရလေသည်။ ခရစ်ယာန်များမှာ ကားအစီးလိုက်ဖြင့် ဘုရားကျောင်းသို့ ရောက်ရှိလာကြပြီး အီရတ်စစ်တပ်ကလည်း ခရီးလမ်းတစ်လျှောက် လုံခြုံရေးအပြည့်အ၀ ပေးခဲ့သည်။

IS အကြမ်းဖက်သမားများလက်အောက်တွင် ငြှင်းပမ်းနှိပ်စက်ခံရသည့် ဘာသာရေးလူနည်းစုများမှာ ခရစ်ယာန်တစ်ခုတည်းမဟုတ်။ ၂၀၁၄ ခုနှစ် သြဂုတ်လတွင် နိုင်ငံမြောက်ပိုင်း ဆင်ဂျာဒေသကို တိုက်ခိုက်ခဲ့သည့်အခါတွင်လည်း ယာဇီဒီလူမျိုးများအပေါ် ဆိုးဆိုးဝါးဝါး ငြှင်းပမ်းနှိက်စက်မှု ပြုလုပ်ခဲ့သည်။ ယာဇီဒီများမှာ လက်ရှိအချိန်အထိ IS အကြမ်းဖက်သားများ၏ လူ့အခွင့်အရေးချိုးဖောက်မှုကို ခံစားနေရပြီး ကုလသမဂ္ဂကမူ ထိုလုပ်ရပ်များကို လူမျိုးတုန်းသတ်ဖြတ်မှုအဖြစ် ရှုတ်ချပြောဆိုခဲ့လေသည်။

ဘဂ္ဂဒတ်မြို့လယ်ကောင်ရှိ Virgin Mary ခရစ်ယာန်ဘုရားကျောင်းတွင် အီရတ်စစ်တပ်မှ လုံခြုံရေးပေးထားသည့်မြင်ကွင်း

Ref: Independent

Related Posts

• မူဆိုးလ်တွင် IS က အရပ်သားများကို အစုလိုက်အပြုံလိုက် သတ်ဖြတ်မှု ရှိနေ (Oct 28, 2016)
• မူဆိုးလ်ထိုးစစ်တွင် တူရကီနှင့် အီရတ်တို့ တင်းမာမှု မြင့်တက် (Oct 24, 2016)
• အရက်ရောင်းဝယ်ဖောက်ကားမှုကို တားမြစ်သည့်ဥပဒေ အီရတ်ပြဌာန်း (Oct 24, 2016)
• အီရတ်၏ မူဆိုးလ်တိုက်ပွဲ အရှိန်မြင့်၊ IS က အပြန်းအထန်ခုခံ (Oct 22, 2016)
• ဓမ္မအန္တရာယ်ကို ညီညွတ်စွာ တွန်းလှန်နေကြတဲ့ အီရတ်မှ မွတ်စလင်များ (Photo News) (Oct 21, 2016)
• အီရတ်စစ်တပ်၏ မူဆိုးလ်ထိုးစစ် အောင်မြင်မှုရနေ (Oct 20, 2016)
• မူဆိုးလ်ထိုးစစ်တွင် အီရတ်စစ်တပ်က ရွာပေါင်း ၂၀ သိမ်းပိုက်ထား (Oct 18, 2016)
• IS ကို လုံးဝရှင်းလင်းမည့် မူဆိုးလ်မြို့သိမ်းတိုက်ပွဲကို အီရတ်စတင် (Oct 18, 2016)
• IS ကို အမြစ်ဖြုတ်မည့် နောက်ဆုံးစစ်ပွဲ အီရတ်က မကြာမီ စမည် (Oct 15, 2016)
• အီရတ်နိုင်ငံမှ ယာဇီဒီအမျိုးသမီးတစ်ဦး ဟာဗယ်လူ့အခွင့်အရေးဆု ရရှိ (Oct 12, 2016)

The post ခရစ္စမတ်မှာ လူနည်းစုခရစ်ယာန်များနှင့် တစ်သားတည်းရှိကြောင်း ပြသလိုက်တဲ့ အီရတ်မွတ်စလင်များ appeared first on News @ M-Media.